فن ومشاهيرقصص وروايات

مغترب رجع شاف بنته

فضل واقف مكانه وهو باصص لأخوه شريف، كأن كل الذكريات القديمة بتمر قدام عينيه في ثانية واحدة.

كان فاكر يوم ما أبوه مات.

كان عنده وقتها سبعة وعشرين سنة.

وشريف هو اللي حضنه وقال له:

“من النهارده إحنا سند بعض.”

صدقها.

وسلّمه الشركة.

وسلّمه حساباته.

وسلّمه ثقته.

دلوقتي…

اكتشف إن أكتر واحد وثق فيه، هو اللي سرق منه عمره.

الضابط مد إيده ناحية شريف.

“حضرتك هتيجي معانا.”

شريف رجع خطوة لورا.

وبعدين اتنين.

وفجأة…

جرى.

القاعة كلها اتقلبت.

الكراسي وقعت.

المعازيم قاموا يصرخوا.

وشريف خرج يجري ناحية الجراج الخلفي للفندق.

أحد أفراد الأمن حاول يمسكه…

دفعه بقوة لدرجة إنه وقع على الأرض.

سيف من غير تفكير جري وراه.

كان الغضب سابق رجليه.

خرجوا برة الفندق.

المطر كان بدأ ينزل.

وشريف فتح باب عربية سوداء كانت مستنياه.

لكن قبل ما يركب…

سيف مسكه من كتفه.

لف شريف بسرعة وضربه بوكس في وشه.

أول مرة في حياتهم يمد إيده عليه.

رجع سيف خطوتين.

لكن قام تاني.

“ليه يا شريف؟!”

صرخ فيها بكل اللي جواه.

“أنا عملتلك إيه؟!”

شريف بصله بعين كلها كره.

وقال لأول مرة الحقيقة اللي كان مخبيها سنين.

“لأن أبويا كان بيحبك أكتر.”

اتجمد سيف.

شريف كمل وهو بيصرخ.

“كل حاجة كانت باسمك.”

“كان شايفك الأذكى.”

“كان بيقول دايمًا… سيف هو اللي هيشيل اسم المنصوري.”

“وأنا؟”

“أنا كنت مجرد الابن الكبير وبس.”

المطر زاد.

وشريف كمل.

“يوم ما أبويا مات… اكتشفت إنه سايبلك 51% من الشركة.”

“وسايبلي أنا 19% بس.”

“ومن يومها… أقسمت إن كل حاجة هترجع ليا.”

سيف بصله بصدمة.

“وأمّي؟”

ضحك شريف.

“كانت أسهل واحد أقنعه.”

“كل يوم كنت أقولها إن سارة هتخليك تبيع الشركة.”

“وإن بنتك هتخلي الفلوس تخرج برة العيلة.”

“لحد ما صدقت.”

في اللحظة دي…

وصل الضباط.

لكن قبل ما يقربوا…

عربية سوداء دخلت بسرعة جنونية ناحية الجراج.

شريف ابتسم.

وقال:

“كنت عارف إنهم هييجوا.”

ركب العربية في ثانية.

والعربية انطلقت بأقصى سرعة.

أحد الضباط صرخ:

“اقفلوا البوابات!”

لكن كان فات الأوان.

العربية خرجت من الفندق.

ودخلت الطريق الدائري.

ركب سيف عربيته المصفحة بنفسه

وقال للسائق:

انزل.”

السائق استغرب.

“يا فندم…”

“قلت انزل.”

ركب مكانه.

ودار بالموتور.

ولأول مرة من سنين…

رجل الأعمال الهادئ اختفى.

وحل مكانه أب…

اتسرقت منه بنته.

واتنهبت حياته.

وداس البنزين بكل قوته.

وبدأت مطاردة، محدش كان يعرف إنها هتكشف سرًا أخطر بكتير من سر الفلوس…

المطر كان بيخبط على إزاز العربية بعنف.

وسيف كان سايق بأقصى سرعة، وعينه ثابتة على العربية السودا اللي قدامه.

صفارات الشرطة كانت بتقرب.

لكن شريف كان عارف المنطقة كويس.

لف فجأة في طريق جانبي ضيق، بعيد عن الطريق الرئيسي.

سيف لف وراه من غير تردد.

بعد دقايق…

وصلوا لمنطقة مخازن قديمة على أطراف المدينة.

العربية السودا دخلت جوه ساحة واسعة، كلها مخازن مقفولة من سنين.

أول ما سيف وقف عربيته…

ملقاش حد.

العربية كانت موجودة.

لكن شريف اختفى.

نزل بسرعة، وفتح باب العربية.

فاضية.

لكن كان فيه شنطة جلد سوداء مرمية على الكنبة الخلفية.

قبل ما يلمسها…

وصل الضباط.

قال أحدهم:

“متقربش… ممكن يكون فيها حاجة خطرة.”

استدعوا خبير المفرقعات.

وبعد الفحص…

اتضح إنها مجرد شنطة أوراق.

فتحها الضابط.

كل اللي فيها كان ملفات.

عقود.

تحويلات بنكية.

وصور.

كتير جدًا من الصور.

سيف أخد أول صورة…

واتجمد.

كانت صورة لسارة.

لكن الصورة مش جديدة.

دي من خمس سنين.

وسارة كانت خارجة من مستشفى.

وفيه راجل واقف معاها.

سيف قلب الصورة.

مكتوب وراها بخط إيد:

“خليه يصدق إنها خانته.”

حس بقلبه بيدق بعنف.

فتح صورة تانية.

كانت لسارة وهي قاعدة في كافيه.

ونفس الراجل قدامها.

لكن مع الصورة تقرير كامل.

اليوم.

الساعة.

المكان.

وزاوية التصوير.

كأن حد كان بيراقبها.

الضابط قلب باقي الصور.

وقال:

“واضح إنها كانت متراقبة شهور.”

سيف همس:

“يعني كل الأدلة… كانت متفبركة.”

الضابط رد:

“واضح إن حد كان بيرسم قصة كاملة.”

لكن المفاجأة لسه ما خلصتش.

في آخر الملف…

كان فيه فلاشة صغيرة.

قال الضابط:

“هنفتحها في القسم.”

بعد ساعة…

كلهم كانوا قاعدين في غرفة التحقيق.

الفلاشة اشتغلت.

ظهر تسجيل من كاميرا مراقبة.

التاريخ…

قبل ثلاث سنين.

الفيديو بيبين سارة داخلة شركة المنصوري.

وبعدها بدقائق…

الحاجة نوال داخلة وراها.

الصوت كان واضح.

نوال قالت:

“امضي الورقة.”

سارة ردت:

“دي ورقة تنازل عن حضانة بنتي.”

نوال قالت ببرود:

“لو ما مضتيش… هحبس أخوكي.”

سارة اتصدمت.

“أخويا عمل إيه؟”

ردت نوال:

“ولا حاجة.”

“لكن عندي ناس يخلوا عليه قض*ية مخ*درات في ساعة.”

دموع سارة نزلت.

وقالت:

“ليه كل ده؟”

ردت نوال:

“لأنك مش هتدخلي عيلة المنصوري تاني.”

الفيديو وقف.

الغرفة كلها سكتت.

حتى الضباط.

سيف حط إيده على وشه.

ولأول مرة من سنين…

بكى.

مش علشان الفلوس.

ولا علشان الشركة.

لكن لأنه اكتشف إن الست اللي حبها…

حاربت لوحدها.

وسكتت.

علشان تنقذ أخوها وبنتها.

وفي اللحظة دي…

دخل أحد الضباط بسرعة وقال:

“يا فندم… لقينا مكان شريف.”

سيف رفع رأسه بسرعة.

“فين؟”

تابع المقال

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *

زر الذهاب إلى الأعلى