سفينة نوح

2

بعد ما الطوفان خلص والمية بدأت تنشف من على وش الأرض، ربنا أمر نوح عليه السلام ينزل من السفينة بسلام وبركة ليه وللي معاه، والسفينة كانت استقرت على جبل الجودي، وزي ما قلنا مش معروف مكانه فين بالظبط، هل في تركيا ولا العراق.

ومن هنا بدأت مرحلة جديدة خالص في حياة البشر.

اللي كانوا مع نوح في السفينة كانوا عددهم قليل، لكن الغريب إن مفيش نسل استمر غير من ذرية نوح نفسه، يعني كل البشر بعد كده راجعين ليه، وده معنى الآية: “وجعلنا ذريته هم الباقين”.

في روايات تفسيرية قديمة بتقول إن السفينة فضلت تلف لحد ما وصلت ناحية مكة وطافت حوالين مكان الكعبة، اللي كان لسه متبناش، لكن المقصود المكان الطاهر اللي هيكون فيه الكعبة بعد كده.

وبعدها استقرت السفينة على أرض جنب جبل الجودي، وبعد ما نزلوا، نوح بنى مكان سكن وسماه “ثمانين” على عدد اللي نجوا معاه.

نوح عليه السلام أول ما نزل كمان شكر ربنا وبنى مكان بسيط للعبادة عشان يفتكروا النجاة ويبدأوا حياة جديدة على أساس الإيمان.

وفي حاجة غريبة حصلت، إن الناس اللي كانوا مع نوح بعد فترة اتفرقت لغاتهم وبقوا بيتكلموا لغات مختلفة، وكل واحد مش فاهم التاني، فكان نوح بيساعدهم يفهموا، ومحدش فاهم ده حصل ليه! ولسانهم اتعوج باللغات دي فجأة ومن غير تمهيد.

هل من أثر الصدمة ومن اللي شافوه، ولا علشان يعمروا الأرض؟ لأن مع الوقت، ومع الانتشار في الأرض وبداية التفرق في أماكن مختلفة، حصل إن ربنا جعل بينهم اختلاف في الألسنة، فبقوا مش بيتكلموا نفس اللغة.

الروايات بتقول إن عدد اللغات اللي ظهرت وصل لعشرات، وفي بعض التفسيرات القديمة بتذكر رقم قريب من 80 لغة، لكن الرقم نفسه مش ثابت ومش عليه دليل قطعي.

لكن مع الزمن، الموضوع خرج عن السيطرة، وكل مجموعة بدأت تبني حياة مستقلة بلغتها وطريقتها.

الفكرة هنا مش مجرد لغة اتغيرت، الفكرة إن البشر بعد النجاة بدأوا يدخلوا مرحلة تشتت وانتشار على الأرض كلها.

وفي رواية تانية مرتبطة بيوم عاشوراء، إن اليوم ده هو اللي استقرت فيه السفينة، وإن نوح صامه شكر لله، وبعده بسنين سيدنا موسى عليه السلام صامه برضه لما نجا من فرعون، والنبي ﷺ قال إننا أولى بموسى فصامه وأمر الناس بيه.

نوح عليه السلام هو وأولاده سام وحام ويافث، ومعاهم زوجاتهم، بدأوا يعمروا الأرض.

بعدها دخلوا مرحلة الاستقرار، نوح بدأ يزرع الأرض ويستصلحها، وفي روايات إنه غرس كروم عنب وبدأ يعتمد على الزراعة عشان يعيش هو واللي معاه.

نوح كان موجود بينهم وبيوجههم وبيعلمهم، وكان بالنسبة لهم المرجع الوحيد اللي فاهم اللي حصل قبل وبعد الطوفان.

مع الوقت أولاده وأحفاده كتروا، وبدأوا ينتشروا في مناطق مختلفة، وكل مجموعة بقت ليها طريقتها ولغتها وشكل حياتها.

وبكده الأرض رجعت تتعمر تاني، بس بشكل جديد خالص.

نوح عليه السلام عاش بعد الطوفان فترة طويلة.

في روايات بتقول حوالي 60 سنة بعد الطوفان، وفي روايات تانية بتقول لحد 350 سنة، لكن المؤكد من القرآن أن سيدنا نوح من أطول الأنبياء عمرًا، وعاش 950 سنة، وهو ثاني الأنبياء بعد سيدنا آدم عليه السلام.

أنجب نوح عليه السلام أربعة أبناء: سام وحام ويافث وكنعان، اللي غرق في الطوفان.

“سام” بعد الطوفان اتقال إنه اتجه ناحية مناطق الشرق الأوسط وبلاد الشام والعراق وإيران، وبيُنسب ليه الشعوب اللي عاشت في المناطق دي بعد كده.

“حام” اتجه ناحية الجنوب أكتر ناحية إفريقيا وشبه الجزيرة العربية، وفي بعض الروايات إنه يُنسب ليه شعوب إفريقيا ومناطق النوبة والحبشة وأجزاء من شمال إفريقيا.

“يافث” اتجه ناحية الشمال والشرق البعيد زي الأناضول وآسيا الوسطى ومناطق القوقاز وشمال آسيا، وبيُنسب ليه شعوب الترك وبعض شعوب أوروبا وآسيا.

والثلاثة دول اللي عمروا الأرض، والبشر معظمهم من نسلهم.

وزي ما كانت حياة سيدنا نوح مبهرة، وفاته كمان كان ليها قصة وحكاية، خصوصًا إنه طلب طلب غريب جدًا من ملك الموت….

لو حابب نكمل، اكتب لنا في التعليقات اللي بنقراها كلها وبنتابعها باهتمام… وقولنا كمان حابب نحكي لك عن مين بعد ما تخلص قصة سيدنا نوح عليه السلام…

زي ما قلنا قبل كده إن سيدنا نوح كان عنده مهمة صعبة بعد الطوفان

إنه يعمّر الأرض وياخد باله من المؤمنين اللي نجوا معاه في الطوفان.

فعلاً عمل كده وكان بيزرع بإيده… وبيتابع المؤمنين في الأرض الجديدة.

بس خليني أحكي لك حاجة مهمة عن حياة سيدة نوح الشخصية.

زوجة سيدنا نوح عليه السلام كانت من نفس قومه، وكانت عايشة وسط ناس كبار في المكانة والنفوذ، وفضلت على كفرها وما آمنتش برسالته، وكانت بتراقبه وتنقل كلامه لقومها، وده اللي خلاها مثال للمرأة اللي ما استفادتش من قربها لنبي.

في روايات بتقول إن سيدنا نوح كان ليه أكتر من زوجة، واحدة مؤمنة كانت بتؤمن بيه ووقفت معاه وركبت السفينة ونجت، ودي أم أولاده سام وحام ويافث، وواحدة تانية كافرة وهي اللي خالفت دعوته وكانت أم ابنه الكبير “كنعان” اللي غرق في الطوفان.

المفسرين اختلفوا في اسمها، في ناس قالت والغة، وناس قالت واعلة أو واغلة أو واهلة.

وفي النهاية ربنا قال إنها هتدخل النار رغم إنها كانت متجوزة نبي من أنبياء الله.

قال تعالى في سورة التحريم:

﴿ ضَرَبَ اللَّهُ مَثَلًا لِّلَّذِينَ كَفَرُوا امْرَأَةَ نُوحٍ وَامْرَأَةَ لُوطٍ ۖ كَانَتَا تَحْتَ عَبْدَيْنِ مِنْ عِبَادِنَا صَالِحَيْنِ فَخَانَتَاهُمَا فَلَمْ يُغْنِيَا عَنْهُمَا مِنَ اللَّهِ شَيْئًا وَقِيلَ ادْخُلَا النَّارَ مَعَ الدَّاخِلِينَ ﴾

سيدنا نوح عليه السلام لما قربت وفاته قعد مع ابنه حام.. ووصاه وصية طويلة ومهمة جدًا، قال له أول حاجة لازم تتمسك بيها هي كلمة التوحيد “لا إله إلا الله”، وقال عنها إنها تقيلة جدًا في الميزان، لو اتحطت في كفة والسماوات والأرض في كفة تانية هترجح عليهم.

وقال له كمان يكثر من ذكر ربنا ويقول “سبحان الله وبحمده”، وإن الذكر ده له قيمة كبيرة لأنه عبادة بتعملها كل المخلوقات، وسبب من أسباب الرزق والبركة في الحياة.

وبعد كده حذّره من حاجتين كبار جدًا، الشرك والكبر، وقال له دول أخطر حاجتين ممكن يضيعوا الإنسان.

وبالنسبة للكبر، سيدنا النبي ﷺ وضّح معناه، وقال إن مش معناه اللبس الحلو ولا المظاهر ولا الإمكانيات، ده مش كبر أصلاً، الكبر الحقيقي إنك ترفض الحق لما يوصلك، وإنك تتعالى على الناس وتقلل منهم وتبص لهم باستعلاء، حتى لو هما صح.

سيدنا نوح كان أكثر الأنبياء عمرًا بعد سيدنا آدم.

وكان قبله نبي الله شيث ونبي الله إدريس.

بس خليني أوضح لك حاجة:

سيدنا شيث بن آدم وإدريس كانوا أنبياء، أما سيدنا نوح فهو أول رسول… شايفك بتقولي في الكومنتات يعني إيه؟؟؟

يعني آدم وشيث وإدريس كانوا أنبياء، لأن الناس وقتها كانوا على التوحيد ومفيش شرك منتشر بالشكل اللي حصل بعد كده، فكان دورهم تعليم وتذكير… كانوا مؤمنين بربنا بالفطرة.

لكن سيدنا نوح عليه السلام كان أول رسول،

لأن في زمانه حصل أول انحراف كبير في العقيدة، وبدأ الناس يعبدوا أصنام زي “ود وسواع ويغوث ويعوق ونسر”،

فربنا بعته برسالة واضحة عشان يرجّعهم للتوحيد ويواجه كفر صريح.

يعني النبي بيكمل ويذكّر… الرسول بيواجه ويغيّر واقع كامل فيه شرك وكفر.

نيجي للحظات الأخيرة في حياة سيدنا نوح، وقلنا إنه مع اقتراب أجله كان حاسس بقرب النهاية.

لما ملك الموت جه لسيدنا نوح عليه السلام عشان يقبض روحه، حصل بينهم حوار مهم.

ملك الموت سلّم عليه وبعدين سأله سؤال مباشر عن الدنيا بعد العمر الطويل ده كله، وقال له:

يا أطول الأنبياء عمرًا، إزاي لقيت الدنيا؟؟؟

نوح رد وقال له: لقيتها زي بيت له بابين، دخلت من باب وخرجت من الباب التاني.

سيدنا نوح طلب طلب بسيط جدًا قبل ما ينتقل معاه، قال له: خلّيني بس أتحرك من الشمس للظل، يعني مكان أقرب للراحة شوية.

وملك الموت وافق على طلبه.. وبعد كده سأله: مستعد للقاء الله؟ ابتسم سيدنا نوح وقال: “لا إله إلا الله”، وبعدها غمّض عينيه وقبض ملك المو، ت روحه الطاهرة….

رحل سيدنا نوح، الشاهد على أكبر معجزة كونية، الطوفان الأعظم اللي بيُعتبر من أكبر المعجزات اللي حصلت في التاريخ كله……

ودلوقتي الاختيار ليك… حابب نكمل؟ اختار قصة من الثلاثة نحكيهالك بكل تفاصيلها وأسرارها.